ന്യൂഡൽഹി: സ്നേഹത്തിന്റെയും സഹനത്തിന്റെയും സന്ദേശവുമായി നക്ഷത്രക്കണ്ണുകൾ മിഴി ചിമ്മിനിന്ന ആർ.കെ. പുരത്തെ ഡി.എം.എ. സാംസ്കാരിക സമുച്ചയത്തിൽ പുതു ലോകത്തിൻ്റെ വാതായനങ്ങൾ തുറന്നിട്ട പുതു വർഷത്തിലെ രണ്ടാം ഞായറാാഴ്ച വീണ്ടുമൊരു തിരുപ്പിറവിയുടെ ഓർമ്മപ്പെടുത്തലുമായി ഡൽഹി മലയാളി അസോസിയേഷൻ്റെ ക്രിസ്തുമസ് - പുതുവത്സര രാവ് ആസ്വാദക ഹൃദയങ്ങളെ കുളിരണിയിച്ചു.
 
വിവിധ ഏരിയകൾ പങ്കെടുത്ത കരോൾ ഗാന മത്സരത്തോടെയാണ് പരിപാടികൾ ആരംഭിച്ചത്. 

ആഘോഷങ്ങളുടെ ഭാഗമായി നടന്ന സാംസ്കാരിക സമ്മേളനത്തിൽ ഡി.എം.എ. പ്രസിഡണ്ട് കെ. രഘുനാഥ്‌ അദ്ധ്യക്ഷത വഹിച്ചു. ജനറൽ സെക്രട്ടറി സി ചന്ദ്രൻ സ്വാഗത പ്രസംഗം നടത്തി. കേരള സർക്കാരിന്റെ ചീഫ് സെക്രട്ടറിയായി നിയമിതനാകുന്ന ഡോ. വി പി ജോയ്, ഐ.എ.എസ്., എസ്.പി.(സി.ബി.ഐ) കിരൺ എസ്, ഐ.പി.എസ്. എന്നിവർ പ്രസംഗിച്ചു. ജെ.എൻ.യു.വിലെ ഹിസ്റ്ററി പ്രൊഫസറായ ഫാ. പയസ് മാലേകണ്ടത്തിൽ ക്രിസ്‌തുമസ്‌ സന്ദേശം നൽകി. ഡി.എം.എ. വൈസ് പ്രസിഡണ്ട്മാരായ മണികണ്ഠൻ കെ.വി., കെ.ജി. രാഘുനാഥൻ നായർ, ട്രെഷറർ മാത്യു ജോസ്, ജോയിന്റ് ട്രെഷറർ പി.എൻ. ഷാജി, സഹായ ഹസ്തം കൺവീനറും നിർവ്വാഹക സമിതി അംഗവുമായ എൻ.സി. ഷാജി എന്നിവർ ആശംസകൾ നേർന്നു കൊണ്ട് സംസാരിച്ചു. അഡീഷണൽ ജനറൽ സെക്രട്ടറിയും ക്രിസ്‌തുമസ്‌ പുതുവത്സരാഘോഷ കമ്മിറ്റി കൺവീനറുമായ കെ.ജെ. ടോണി കൃതഞ്ജത പറഞ്ഞു. മാളവിക അജികുമാർ അവതാരിക ആയിരുന്നു. 

കേരളത്തിലേക്കു മടങ്ങുന്ന ഡോ. ജോയി ഐ.എ.എസ്.നെ ചടങ്ങിൽ ഡി.എം.എ. അനുമോദിച്ചു.

കരോൾ ഗാന മത്സരത്തിൽ മയൂർ വിഹാർ ഫേസ്-3 ഏരിയ ഒന്നാം സമ്മാനവും ജനക്പുരി ഏരിയാ രണ്ടാം സമ്മാനവും രജൗരി ഗാർഡൻ ഏരിയാ മൂന്നാം സമ്മാനവും കരസ്ഥമാക്കി.

ജനക്പുരി, വികാസ് പുരി -ഹസ്ത്സാൽ, വസുന്ധരാ എൻക്ലേവ്, അംബദ്കർ നഗർ-പുഷ്പ വിഹാർ, വിനയ് നഗർ- കിദ്വായ് നഗർ, രജൗരി ഗാർഡൻ എന്നീ ഏരിയകളിലെ കലാകാരന്മാർ അവതരിപ്പിച്ച വർണ ശബളമായ പരിപാടികൾ ആഘോഷങ്ങൾക്ക് മിഴിവേകി.